一失足成千古恨，盛品儒多得𡃁模郭奕芯（Ashina）給予一個攬錫的機會，斷送了他跟蔡一鳳（Michelle）的姻緣，女方知道男友偷食𡃁模即刻斬纜，盛品儒在事業和愛情方面都失去蔡一鳳的支撐，昨狹路相逢即認錯，還公開愛的宣言求復合。
分手情人盛品儒和蔡一鳳昨日前後腳現身中環四季酒店利嘉閣地產33周年酒會，兩人尷尬合照後，蔡一鳳拒絕接受訪問，盛品儒為女方擋駕，停下來做訪問，不過他有備而來不停認錯：「我哋喺件事之前已經分開咗，係上星期四。嗰日傾完想箍煲，我不勝酒力，全部係我錯，係我責任，好對Michelle唔住，連累到佢，希望呢件事有任何人得益都唔好出嚟宣傳，唔想Michelle再受傷害。」
Ashina否認整容
盛品儒言下之意，是指𡃁模Ashina佈局博宣傳，他斬釘截鐵說：「我冇講人名，條片俾人拍咗，我唔想講咁多，我唔知做乜，醉咗。睇片佢錫我，我有向後退，但冇講，唔緊要，anyway，全部係我錯。」
一輪認錯之後，盛生發揮小宇宙，向前度公開愛的宣言，語重心長：「Michelle係真真正正我等咗30幾年，就係等呢個人，之前分開咗一直好傷心，如果我盡力去做而復合，呢段感情會更堅固。」其實昨晨盛品儒已經在facebook留言，內容跟上面訪問差不多，大概都是指他酒後亂性，被人設局陷害和希望復合之類的東西。
另外，事件主角一之的𡃁模Ashina被指曾經整容，不過她前晚在尖沙嘴受訪時只承認在鼻和下巴打過Botox。昨日她回應盛指控搏宣傳時說：「佢心知肚明。」
採訪：林嘉慈、何永寧
攝影：陳慧安、何永寧
