【壹週刊】夏天要出街真係十萬個唔情願，天氣又熱又濕，係人返到屋企都想第一時間沖個靚涼啦。其實狗狗都一樣，不過次次沖涼就人狗大戰咁，浴缸仲滿佈狗毛，點算好啊？呢個「半自動沖涼機」就幫到你喇，主人既可以親自幫狗狗沖涼，又唔使搞到屋企一團糟。真係偉大發明啊！
呢部沖涼機嘅右邊，可以自己調教冷暖水清洗，水溫可以調教1-5級，大約20-40度。如果幫大狗沖涼，仲可以用自動嘅置頂式灑水；細狗呢？就可以用手動式花灑。
先幫狗仔沖濕個身，再用泡沫化嘅梘液捽勻狗仔全身。梘液加水打成稀釋泡沫後會降低濃度，減少梘液濃度太高而傷害寵物毛囊引致敏感嘅機會。
清洗泡沫嘅時候可以打開活門，防止狗狗郁動時嘅水花彈上主人身上。用毛巾稍為抹乾身之後，就可以用乾風模式幫狗狗吹乾個身。可以調教時間同溫度，加上四個出風位，風力均勻，好快就搞掂。
沖涼時唔好忘記用棉花球塞住狗狗耳仔，咁就唔怕啲水流去耳仔度喇！有咗呢部由台灣設計、製造同引入嘅「自助沖涼機」，主人就可以輕輕鬆鬆幫狗狗沖個靚涼，最緊要，唔使喺屋企慢慢執狗毛嘛！
iPhone App免費下載：
http://bit.ly/nextplus_iphone
Android App免費下載：
http://bit.ly/nextplus_android