世界盃主辦國巴西前晚對住德國竟以1比7大敗，球迷跌到一地眼鏡碎，立法會都有唔少巴西躉哭波喪。超級巴西迷、身為前流浪、愉園班主嘅工業界林大輝都有捱眼瞓睇直播，對賽果當然感到好意外，以「不可思議」嚟形容。
另外兩個巴西躉，民主黨胡志偉同民建聯陳克勤都係遲咗開電視，點知一睇之下，發現森巴兵團已經落後緊5球。5比0喎，點追呀？志偉費事眼冤，即時熄電視瞓覺好過。
陳克勤就話睇到巴西被德國大炒時，一度以為自己眼花，但佢堅持捱到完場。至於早前踢波踢到斷腳嘅長毛梁國雄，原本估巴西會捧盃，見到咁嘅賽果都大呼無癮，質疑巴西係咪有球員打假波。