【本報訊】梁芷珊與羅傑承育有一女，今年12歲，女兒2002年出世，這一年，同樣大戰連場，「世界盃對於我同個女，有特殊意義，佢8月出世，嗰年嘅6、7月，正舉行日韓世界盃，出面打鼓，佢就喺我嗰肚入面踢腳」。臨盆前兩個月，屈在家日睇夜睇，球場上的悲歡成敗，成了「另類胎教」，孕育出愛足球的女孩，一個足球，由香港踢到全世界，都是母女間的親密話題。
問到口啞啞仍樂在其中
「由出世到𠵱家，個女經歷過3屆世界盃，4歲嗰年咩都唔識，8歲開始跟我哋去睇波，學識咩叫睇波禮儀，我哋同佢去英國睇波，熱刺主場對阿仙奴，佢會知道唔應該着紅色衫，要識得尊重主人家。到今年12歲，佢話好享受同啲同學一齊傾足球，世界上有咩話題，要關心要知道，有自己立場同觀點，覺得佢真正大個女，有自己社交圈子，睇見佢，令我諗起自己點解咁鍾意睇波。」
三口子都愛足球，世界盃，就成為最佳親子時間，由睇波禮儀到體育精神，一樣傾得津津有味，「佢知道我好鍾意蘇亞雷斯，會問我佢又咬人你點睇？我會答個女，蘇亞雷斯係天才，天才總與常人有啲分別，但咬人係唔啱，但佢已經受罰。而最得意係佢會跟手問點解有時喺球場度，有球員踢人又只係領黃牌呢？究竟咬人留牙印定踢人應重罰？」就算被問到口啞啞，也樂在其中，親子無價，信焉。
【依波Live】即睇直播：
http://worldcup2014.appledaily.com/match/live
http://bit.ly/EballLive