佔中、反佔中、七一遊行、警察拉人等等，本以為係政治議題，想唔到竟然可以成為生財工具，乜唔係呀，睇吓七月二日、三日、四日嘅「大公報」、「文匯報」、「星島日報」就知，不少荷包有錢嘅社團、協會，紛紛在呢三張報紙刊登甚麼「反暴力」、「反佔中」、「和平」、「支持警察依法行事」諸如此類嘅廣告，每版廣告收幾多錢，不得而知，但短期間有咁多呢類廣告浮現，都係錢吖，有益報紙營業額。一位相熟公關話，呢類廣告嘅全版廣告在某報刊登，只需八千大元，抵到爛，對福建幫富豪嚟講，未必夠食一餐飯。
有位朋友問：「點解突然間有咁多維穩社團嘅？」梗唔係突然間啦，只要長期閱讀該兩份愛國報紙嘅社團版，就知道回歸十七年以來，幾乎個個月，甚至每個星期，都有新社團成立，成立之時嘅典禮宴會，總有中聯辦人員出席或主禮。個別例子唔講嘞，只講虛擬例子，譬如話有個K區：有人組織K區總商會，商會下又有好多個不同行業商會，各行業之間又可以細分，開設更多供應商商會，幾似一氣化三清，撒豆成兵咁嘅方法，至於會員、成員有否重叠、重複，唔通叫蘋果日報調查組去跟查咩，香港普通市民亦唔得閒理。
呢類社團平時只見聯誼，慶祝國慶，慶祝回歸等等，但到了有大事發生，例如政改，就會發揮「群眾」角色作用咯噃，幾多社團聯署反佔中呀，外國人來港見到，以為「全城氣憤鬧爆佔中」㖭。不過，社團數目雖多如繁星，但真正參加活動嘅，來來去去都係一班富商名流，出錢嘅，相信又係佢地，幾令人同情。富商咁出錢出力去維穩，並非俾面梁振英，而係俾面西環啫，適當時候，自會得到政府表揚（太平紳士、紫荊勳章之類）。咁佢地可唔可以代表民意呢？幾難講，畢竟自1949年起，香港就有左派親共人士，各階層都有，左丁山兒童時代嘅包租公，就係擁護五星旗嘅，依家北京政府有資格周遊列國派錢簽訂單，自然更有吸引力。但由呢類人士發起「反佔中簽名」，聲稱要搵夠80萬人簽署，左丁山就幾懷疑佢地有無如此吸引力！