美國樓市復蘇咗幾年，主要唔係靠自己，而係海外買家幫手。根據美國房地產協會（NAR）嘅報告，截至3月底一年，海外買家用咗922億美元（約7,200億港元）掃美國樓，按年增加35%。估吓邊位係「幕後推手」？當然就係強國人啦！
期內中國人用咗220億美元（約1,716億港元）買美國樓，佔比24%排第一；如果以成交宗數計，中國只佔整體16%，唔及加拿大佔19%。喜好方面，內地買家較鍾意到紐約、加州同埋華盛頓呢啲高樓價地區買樓，楓葉國人就多數喺佛羅里達州及亞利桑那州等較平嘅地區置業。報告仲話，人民幣升值，令美國樓更抵買，吸引唔少強國客。有分析話，內地樓市過熱，加上呢幾年海外好多資產市場都升得多，中國客想分散投資，美國樓市就合晒心水。