星期二先講過，微軟Cortana預言巴西輸俾德國，不過斷估Cortana再勁，都估唔到巴西恥辱性狂輸7粒！場波踢完一刻，即時諗起《少林足球》入面，谷德超發炆憎話：「你哋唔好咁喇！我想踢波呀！」見報之時，就會知道阿根廷係咪會一如預言，搞掂荷蘭。大市噚日狂跌最多超過400點，都係搵啲股仔炒吓。近來個市掀賣盤潮，俊和（711）大股東一話賣盤，噚日逆市繼續升，不過升幅已縮到得番4.5%。而家隻股市值炒到去9.6億元，PB係0.6倍。水位係有，但恐怕要震一震倉先，趁佢調整時搵過隻炒住先。
景福（280）查實同俊和一樣，勝在NAV夠高，有1.3元；景福仲乾淨，完全冇債。當日傾賣殼份公告一出，股價狂飆。講真你睇佢近年業績，有錢賺嘅時間，盈利增長唔多，上年仲要蝕錢，股東想閃都有道理。近年，景福先後沽走手頭非核心業務，包括沽清所持有的港交所（388）證券投資，結束旗下證券業務，賣走物業換現金，輕裝上路，明顯為賣盤部署好耐，所以善價而沽機會大。隻股之前隊過落嚟，但成交得雞碎咁多，擺明係「幻覺嚟㗎啫，嚇我唔到嘅！」而家你睇到個圖，旗形做得幾靚，已有所突破，噚日仲要高位收市。隻殼最新市值先係6.2億元，PB係0.73倍。呢個moment學「大師兄」話齋：「我要爆喇！」
Fifi
http://www.facebook.com/lovefrystock
本欄逢周二、四刊出