只有抬頭，才能見到海闊天空。
陳法拉(Fala)去年毅然離開TVB，獨自試闖中港影視圈。轉變期後的這個2014夏天，法拉匿在內地海島拍新片，日日高溫暴曬做女海盜。直認不懂打天才波，瘋狂享受刨劇本、刨書，甚至學習享受等待。32歲人生的下一站、下一個時空，陳法拉暫時只想任性地留給演戲，至於愛情，麻煩先讓讓路，「我會係一個稱職嘅戲劇女友！」
撰文：林妙萍
攝影：郭賢興
造型：趙潔恆
化妝：Annie G.Chan
髮型：Alex So of P.O.P Eight
陳法拉近期變「失蹤人口」，全因投入新片拍攝，在鄭中基與陳嘉上執導的笑片《神秘寶藏》（前名《張保仔》），飾演女海盜，和黃子華等一齊搞笑。Fala閉關廣東省海陵島兩三個月，「好似去夏令營嘅感覺，喺海島上，同一班好朋友，一齊開會、傾偈、食海鮮咁，好似去workshop咁。」
刨刨書 說說笑
陳法拉去年受訪時，正值離開多年大樹TVB，往日排到密無氣唞的日程和時空，突然消失，當時的不安現在轉變成功，「開始有啲習慣，唔使日日拍嘢，夜晚有得瞓嘅感覺，至於之前不安、有點失業嘅味道，已經無咗喇。」無工開原來也可以很快樂，「我哋住喺一間望住山景嘅酒店，乜都無，一張床，一張梳化，無得上網，因為網速係龜速，可以好靜心咁睇書，好似休養期咁。」有時間刨書，在淘寶喪網購，睇中外經典劇本、美劇小說等，堆滿酒店房，刨到連簡體字也學識。
新片中飾講潮州話的女海盜，和操不同口音的黃子華、鄭中基雞同鴨講，男主角全部笑匠高手，一埋位就令人想笑，Fala呢，自行努力，「我唔係一個反應好快，轉數好快嘅人，打天才波嘅人，我要諗嘢，左度右度，做笑匠係好難，捉到搞笑Timing真係好難。」認真不會輸，演員都有自己一套，法拉就繼續自己土法煉鋼式，日諗夜度，認認真真鑽研。
白變黑 黑變白
Fala在新片開拍前狂操，搞到頸椎受傷移位，海陵島高溫達50度，最毒是海上陽光，「試過差點中暑，頭痛到不得了，曬到每個人都黑晒，日日求個天陰天，佢哋都笑我見光死。」海風一吹太陽一曬，立即變黑，快過美源髮采。「着古裝衫，長袖、扣上頸，好厚衫遮晒，應該曬唔黑啦，但我返酒店一除衫，係個肚位黑咗，因為陽光太強，滲透入衫入面，只有底衫下面膚色係真實，好似去沙灘着比堅尼曬咁！」女人愛美，白和黑，如同打仗一樣，「日日mask，唔止塊面，我係鋪晒成對手咁，防曬係搽最高嗰類，成100度。」
愛情先等等
05年來港選華姐，之後留在TVB發展，在香港遇上Neway太子爺薛世恆。兩人拍拖多年分手，Fala戀情未見有新一頁，連緋聞名單都未有新名字，「無呀，真係無拍拖。」不是悲觀，不是樂觀，只因暫時愛上「另一個」：「我係一個好稱職戲劇女友，真係好鍾意演戲，𠵱家任性吓先啦。」女人也想有人愛，只是學會等待，「唔係唔去諗，係無遇到啱的，愛情係緣分，無就等啦，等吓先囉。」
更多精采時尚內容，盡在 http://add.appledaily.com。