港視（1137）主席王維基（Ricky）就未獲免費流動電視牌照一事，提出司法覆核，將於下個月開審，咪以為Ricky因忙住準備司法司覆而停晒其他工作，好似網購咁，近日就話嚟緊會搞多個app配合年底推出嘅網購。
除咗網購，Ricky冇停過電視業務，話說華華近日經過港視將軍澳工業邨電視城地盤，發覺佢哋將地盤外嘅圍板拆低咗，坐車時可清楚望到地盤內嘅情況，見到爛地一片；據接近將軍澳工業邨線人話，港視地盤嘅圍板拆低咗一段日子，近日亦聽聞過電視城會開始動工添，仲話若果唔係開始起嘢，又點會無端端將啲圍板拆低呢？
其實諗諗吓，Ricky話過，始終最想做嘅係電視，況且佢講明購物台會有節目播，又考慮用劇集吸引大家網購，所以起個細細哋嘅電視城做製作，都唔係冇可能。港視發言人對於華華嘅諗法就話「冇資料可補充」喎。