全球各地網民瘋狂改圖，已經係世界盃大戰必定出現嘅賽後娛樂。德國數巴西七個一皮，網民梗係抽水抽到亞馬遜河都水乾，連巴西地標耶穌山、今場冇份踢嘅尼馬都成為改圖對象。
巴西經歷國恥日，但網民似乎唔想放過佢哋，繼續喺傷口上灑鹽，里約熱內盧嘅救世基督像（別名耶穌山）作為巴西地標，網民第一時間惡搞咗先。耶穌像原本造型係展開雙臂救世，不過國家隊大敗，網民就惡搞成耶穌以手掩面，一副無奈嘅表情，甚至有網民直接將耶穌像改成德國女總理默克爾振臂高呼像，或者將耶穌像從山頂移走，改為德國地標：科隆大教堂，嘲笑巴西已經俾德國統治。
尼馬冇踢都拉落水
巴西首席前鋒尼馬今仗因傷缺陣，不過網民冇因為佢缺陣而忘記佢。尼馬幫「7字頭」汽水品牌嘅廣告，立即被翻舊賬，可惜呢個7字唔係巴西贏波次數，而係巴西一場失波數字；另外就有尼馬包晒繃帶要求落場嘅漫畫，不過尼馬都改變唔到巴西出局命運。躺著也中槍仲有莫耶斯，網民改圖原來史高拉利嘅真身就係呢位前曼聯領隊。鬼咩，兩位教頭都創咁多紀錄，不過全部都係衰紀錄。
相反，湯馬士梅拿就威風八面，雖然佢呢場只入一粒，要決賽至少入一球，先有機會衞冕金靴獎，不過梅拿仔嘅入球能力，已經被改圖做軍人，用迫擊炮向巴西大門炮轟咁勁。
官方Logo亦難倖免
世界盃大會圖案同巴西國旗亦都無辜被牽連，今屆世界盃官方圖案原本以國際足協盃為雛形，以一對手捧起足球，但改圖組就將圖案由0:1改到0:5，猶如球迷由0:1嘅開心樣，到0:5嘅冇眼睇樣。而巴西國旗亦被波及，中央原本係一個藍色地球，結果被改為龍門口有7個失波，另一版本更涼薄刻毒，講德國球員一腳踢走巴西嘅藍地球。
【依波Live】即睇直播：
http://worldcup2014.appledaily.com/match/live
http://bit.ly/EballLive