【培養興趣】
連續一個月追睇世界盃，賽事完結後，難免有空虛、失落感覺。精神科專科醫生李德誠教路，球迷應重新投入睇波之外的嗜好或興趣，逐步回復正常生活。如非常熱愛睇波，對今屆賽事仍念念不忘，可在閒暇時間回顧賽事精華，或過往一些歷史性賽事，甚至約三五知己聚會，一起分享睇波樂趣。「原本幾乎晚晚睇開波，突然冇得睇，會變得好空虛，覺得無所事事，唔知下一步點算好。自己捧嘅隊輸埋波仲會帶嚟打擊，容易耿耿於懷」。部份人的情緒會變得不穩定，有焦慮症狀及日間難以集中精神。對較少嗜好或興趣的人來說，「冇波睇」的影響尤其大。
要踢走空虛感覺，不妨重投自己的其他興趣，包括放工後跑步、約朋友聚會等，或學習新事物、培養興趣，甚至籌備暑假旅行，有助回復正常生活。鍾情足球賽事的市民，可翻看今屆賽事的精華或入球片段，與朋友「講波經」分享。另不妨「落場」踢波，響應一下踢波熱潮。
《蘋果》記者