愛字堆又內訌，又係為咗個錢字！以李偲嫣為首嘅「正義聯盟」，噚日發出「嚴正聲明」，譴責「愛港之聲」召集人高達斌。事緣高達斌喺前晚嘅港台節目上提及，上年8月喺旺角舉辦嘅撐警隊活動，佢同主辦單位有錢銀糾紛。舉辦活動嘅私煙BB話，高達斌並無捐助過嗰次活動，一切都係高達斌無中生有，佢保留法律追究權利。
保皇派自相殘殺時有所聞。上年喺城大舉行嘅佔中論壇，一班愛港力成員多次喺台下叫囂阻礙嘉賓發言，高達斌即刻同佢哋劃清界線。愛港力嘅陳淨心喺facebook反擊，留言話「有心破壞香港的一小撮人，有乜好討論？愛港之聲高達斌要跟愛港力劃清界線無問題，你們繼續坐定定！我們愛港力繼續對抗禍港政棍！」