看到密西比寫TVB，海迪亦想在此分享兩件小事。第一件，有朋友近日換電視機，他發現原來現時市面上每款新電視，幾乎都具備了上網功能。他換咗新機後，睇少咗好多電視台，轉為上網揀自己鍾意睇的content。連一般被認為無咁識用「科技嘢」的父母，都開始習慣上網煲劇，而這趨勢在長輩之間更有擴散迹象。
另一件小事，是有朋友早前到美容院，發現店內新裝咗部大電視。原本她沒多留意，以為佢例牌播緊TVB；但睇真啲才發覺，部電視竟然係播緊蘋果動新聞，海迪聽完，不禁倒抽一口涼氣。
時代真係唔同咗。在網絡極度普及的今日，再唔係由渠道主宰你今日睇乜，而係由你自己決定睇乜、同幾時睇。
那些小米電視、樂視電視，可以賣到49吋、三至四千蚊人仔一部，就是他們情願蝕賣，都希望部機先入屋，之後才想辦法賺返你錢。TVB未來對手，不可能只有亞視，而是要和世上其他所有Apps，一同競爭香港人寶貴的時間。單靠免費電視壟斷優勢，已不足夠。
買下世界盃轉播權，然後放在收費台播，再焗你簽約，這種做生意的手法，十幾年前已在使用，放在今天是否仍然work？長遠而言，TVB需要思維上改革，才有機會在新時代中不被淘汰掉。
海迪
海迪外遊，故樂香園在下周二、四將暫停，7月22日再見。