【眼光獨到】
【本報訊】巴西大敗，人人驚奇，老早被高登仔封為「波神」的才女梁芷珊，卻氣定神閒，「一早諗住巴西會輸」。不是事後孔明，早在大半個月前的揭幕戰翌日，她就買下「德國對荷蘭」的決賽組合，距40倍彩金袋袋平安，只一步之遙。睇好荷蘭奪冠、熱捧歐洲隊的她，笑言只因德國太熱，難刀仔鋸大樹，「波咩神吖，師奶仔就真」。
記者：呂麗嬋
自從試過在facebook分享賭英超200蚊贏16萬、1,500蚊過關贏20幾萬，梁芷珊即時由睇波門外漢，榮升高登女波神。不過，近半年來，她卻半封刀，極少在公開平台分享下注心得，「我係好多間學校嘅校董，個平台多年輕人睇，都係低調啲好」。只是大戰當前，「技癢」的她，還是忍不住考考自己眼光，「德荷都鍾意，德國太熱，賠6、7倍；荷蘭賠23倍，投注少，梗係揀隊回報高嘅」。
愛分析球隊個性
踢左望右，只因「師奶仔心態」作祟，「我睇波嘅資歷好淺，好多識波人會睇數據，但我覺得，數據都係機會百分率，強如拜仁、巴塞，都無可能100%穩贏，我反而鍾意用另一角度去睇」。男人睇波愛看往績，愛觀察人的她，就愛看個性，「人人都話西班牙地上最強，但我就覺得，對比德國同荷蘭人，佢哋比較浪漫同藝術家，世界盃要打足一個月，係持久戰，要有紀律」。
當足球王國都可大敗一比七，任何分析，大概都成了「信則有不信則無」，才女波神笑言唯一可肯定的，是一家人對歐洲球隊情有獨鍾，「近幾年逢英超揭幕，都會去英國睇波，之前又去過德國同葡萄牙，比較熟悉，自然有感情」。有說愛哪種波路，多少反映性格，愛紀律也愛天才球員的她這樣說：「搞過波，自然鍾意球員有紀律性，11個人好有紀律咁去達成同一個目標，係一件令人好感動嘅事。」
讚蘇亞雷斯蛻變
未嫁球迷丈夫之前，她就如普通人一樣，看世界盃，純粹是因為競賽氣氛，但搞波八年，由天水圍飛馬到南華，貼身與球員接觸，卻教她學懂從另一角度，欣賞球員付出的努力，「正如蘇亞雷斯，佢係我心目中嘅天才球員，上季英超利記開得差，但我真係見到佢嘅改變，由獨食到唔獨食，對於一個對自己好有信心嘅球員嚟講，一啲都唔容易」。告別班主生涯，一樣惜才，才女波神，唔止刀仔鋸大樹咁簡單。
【依波Live】即睇直播：
http://worldcup2014.appledaily.com/match/live
http://bit.ly/EballLive