近百年歷史，前身為荔枝角醫院嘅饒宗頤文化館，剛於6月中正式開幕，恒生銀行（011）旋即跟館方合作，舉行「恒生．饒宗頤文化館歷史文化獎勵計劃」。恒生一姐李慧敏話，希望可以推動青年認識香港社會變遷，體會到香港人喺唔同年代所發揮拼勁，同埋自強不息精神。
據恒生企業責任主管何卓惠介紹，呢個計劃包括「香港百年蛻變」圖片展，展出近80張珍貴照片，恒生貢獻其中3張，包括40年代位於皇后大道中嘅恒生寶號外貌，70年代恒生贊助嘅著名校際問答比賽節目「溫故知新」劇照，仲有70年代恒指舊照。
單係呢幾張舊相，已經輕易勾起大眾嘅集體回憶。恒生估計，有40間中學、約2,000名學生參與計劃。
照片提供：恒生銀行
