祖國報載，祖國印刷線路板上、下家經歷三年低谷，今年嚟接單充裕。場內建滔積層板（1888）仲未郁過，超級抵玩。
上游行業定單勁
建滔板主打覆銅面板，兼且係全球性龍頭企業之一，講規模，掃晒。而據祖國報載，今年歐美再打開消費同採購大門，拉動電子產品需求，加埋祖國4G同汽車市場有唔錯環境，印刷線路板供應商第一季接爆單，第二季亦繼續火爆。
建滔板主打產品，係印刷線路板主要元件，上家好景，加埋集團優勢，掂過碌蔗。
再講，阿爺支持新能源電動車項目，加埋全球汽車智能、電動化，汽車電子市場需求先啱啱開始。
專業估計，全球汽車電子規模，到後年時，將高達1.8萬億港銀。繼智能電話後，汽車市場對電子元件需求好勁，建滔板應該分一大杯羮。
又建滔板side business搞內房，第一個項目預售理想，兼應該可以喺今年入賬。呢壇製作，唔單止支持建滔板業績，兼隨時係家陣高達5.6厘息率回報下，再憧憬有派送，流晒口水。
場內專業評估，建滔板今年EPS係咁意增長10%，到0.45元，預測PE得6.6倍。又建滔板現價（2.99元）貼住三年低位，貼到實一實，股價一年以嚟，就打橫行未升過，PB得0.7倍。
祖國上、下家，生益科技一年累升咗26%，PB 1倍，預測PE 8倍、金安國紀一年更加累升咗58%，PB上到2倍，又超華科技PB高達3.2倍，預測PE上到69倍。無論點樣計，建滔板都真係超級超值。
買建滔板，唔好貪多，係咁意博翻半番上到4蚊計數，PB先啱追到上生益，預測PE先得10倍咁大把。
錢雋
細價股專家
本欄逢周二、三、五刊出