NBA球星基斯保羅（CP3）又返嚟喇！呢位快艇控衞噚日應贊助商邀請，由上海抵港出席一連兩日嘅籃球推廣活動。雖然抵埗只有幾個鐘，但佢喺噚晚即刻出席網上直播活動，仲同3位球迷近距離接觸。
早喺CP3抵港前，贊助商已透過Facebook請咗3位幸運兒做直播嘉賓。活動歷時45分鐘，CP3一坐低，身邊嘅女球迷就要求抱抱。之後佢就逐一回答網民提問，更加唔介意俾主持拎身高當話題，搞笑咁話希望可以高多2、3吋。
之後會場就變身「冒險樂園」，由CP3喺籃球機前對戰球迷，最終佢拋離36球大熱勝出啦！如果球迷錯過咗直播都唔緊要，因為佢今日晏晝兩點半仲會踩入西灣河，喺協青社蒲吧嘅Jordan球場為年輕球員客串教練，想一睹偶像風采，到時記得去碰吓運氣喇。
【依波Live】即睇直播：
http://worldcup2014.appledaily.com/match/live
http://bit.ly/EballLive