正所謂「天下無不散之筵席」，熱火10年組成三巨頭後，一口氣入咗4次總決賽，拎咗兩次總冠軍，雖然上月總決賽輸畀馬刺後，勒邦占士、保殊都話會坐埋一齊，傾吓下季點組軍，不過一個月都唔夠，睇嚟兩個都想跳船，保殊俾火箭開出嘅頂薪合約搞到心癢癢，勒邦占士仲傳會返騎士㖭。
三弟思鄉或過檔
其實保殊同勒邦占士上星期都傾過，當保殊知道留喺熱火，最多都係得5年9,000萬美金合約，仲可能要為球隊犧牲再減人工，心情當然唔舒服。呢位30歲嘅「三弟」本身喺德州達拉斯出世，一直都想返家鄉打波，小馬唔搵佢，轉去隔籬嘅侯斯頓，都係一個好選擇。本身擁有懷特侯治同夏登嘅火箭，一直希望再組三巨頭，火箭可以畀到4年9,000萬美金合約，而且又同「魔獸」「大鬍子」合作，實力唔算差。不過火箭如果要簽到保殊，始終要清貨，射手柏臣斯已經被犧牲，火箭唔同佢續約，好大機會去小馬，台灣之光林書豪同中鋒阿斯克都會成為開刀對象。
大帝若返騎士4狀元聚首
熱火球迷或者對三弟走人唔太擔心，但連「大帝」勒邦占士都話走，就肯定打擊好大嘞；最近就有傳大帝想返騎士，或者1、2年前大帝返騎士仲係天方夜譚，事關大帝4年前嘅「The Decision」傷得克里夫蘭人太深。不過近期大帝不斷向克里夫蘭示好，好似上月返家鄉度假，大帝太太仲話最愛克里夫蘭，騎士班主基拔亦都靜靜地刪除球會網頁對大帝怨恨嘅公開信。講真騎士本身都有薪酬空間，加上陣容有K艾榮、A域堅斯同班尼特呢3位狀元，班尼特係就係廢廢哋，不過勒邦占士回巢，齊集4位狀元，前景都幾樂觀㗎。另外仲有傳，勒邦占士想離開熱火，係因為獲迪嘅傷患好嚴重，冇咩機會打番之前水準，自然就俾大帝嫌棄。
連續4季打總決賽，熱火都唔想勒邦占士同保殊離隊後成績一落千丈，周一就落實簽入兩位前鋒，包括上季中轉投快艇嘅格蘭加，同埋山貓（今季改名黃蜂）前鋒麥羅拔斯，31歲嘅格蘭加只收2年420萬美元合約，如果佢真係打番溜馬時期一半水準，已經抵到爛；麥羅拔斯都算內線防守悍將，就算保殊走人都頂得吓。
【依波Live】即睇直播：
http://worldcup2014.appledaily.com/match/live
http://bit.ly/EballLive