世界盃4強最後一戰今晚就踢，入得4強嘅肯定係頂級、超卓。荷蘭同阿根廷都唔例外，尤其係佢哋有好多個超級球星孭飛，我估呢場波一定冇悶場，今晚仲唔準備定薯片汽水撐場咩！
講起呢場荷、阿大戰真係好多人都好期待，唔單止係球隊之間嘅對決，仲係球星嘅show off戰，尤其喺中場有洛賓大戰美斯，淨係睇佢哋兩個嘅秀麗腳法都抵，而且兩個都係「扭得」之人，今場真係要睇吓邊個扭贏至得；前線就有尹佩斯同埋話會復出嘅阿古路合演迷你版嘅曼市打吡，呢個組合對英超迷嚟講相信特別有feel，而我亦想睇吓史奈達（圖）今場會唔會再整多球衝力射球畀球迷過吓癮。
另外，荷蘭賽前就被迫換酒店，對球員嚟講唔係好事。我都有集訓嘅經驗，雖然未試過中途轉場，但每次都需要啲時間去適應吓張床，荷蘭今次去到4強至嚟轉場，班球員要響咁短時間內重新適應，真係隨時無覺好瞓。不過對呢班頂級球星嚟講，出外集訓都係濕碎料，相信佢哋適應能力都好強，總之今晚就等睇好戲啦！
文：許家樂
【依波Live】即睇直播：
http://worldcup2014.appledaily.com/match/live
http://bit.ly/EballLive