動議反佔中同撐白皮書外，染紅嘅區議會向新界東北示威者埋手。西貢區議會成先頭部隊，該區保皇黨噚日喺大會動議強烈譴責示威者暴力行為，又要求警方嚴厲執法。佢哋話立法會日前討論新界東北發展時，場外示威團體同警方爆發激烈衝突。但對於粗暴通過撥款嘅財委會主席吳亮星就隻字不提。
喺區議會一片紅嘅格局下，保皇黨嘅動議點會有得輸？動議最終以14票支持、4票反對獲通過。有份反對嘅新民主同盟梁里話，當日係警方同立法會佈防有問題，當日示威者係和平集會，直至議會打算強行粗暴通過撥款時，示威者先至強行進入立法會。話示威者暴力，立法會夾硬嚟咪仲恐怖。