曼聯球衣贊助醞釀改朝換代，話唔定下年由一剔轉三間！Nike話曼聯獅子開大口，成績咁鬼差仲夠膽死要求天價續約，打算放棄紅魔。吼咗曼聯好耐嘅adidas就最開心，可以同曼聯傾新約。
貴皇馬紀錄成倍
曼聯同一剔份約到下年夏天屆滿，𠵱家曼聯每年坐收4,100萬美元贊助費，另外仲有分紅，例如喺12/13球季，紅魔實收6,470萬美元。不過，曼聯嘅胃口相當大，雖然佢哋上季俾莫天才玩到得聯賽第7、下屆冇份踢歐聯，但仲夠膽向一剔開天價續約，要求一份為期10年、總額達10.3億美元（約80億港元）嘅合約，除一除條數，每年曼聯袋成億美元，高過𠵱家球衣贊助紀錄保持者皇家馬德里成倍，真係唔怪得一剔耍手兼擰頭！
路透社引述消息話：「一剔嘅足球業務增長得好快，完全有能力滿足曼聯嘅要求，但睇番雙方嘅條件，一剔決定唔續，因為唔符合商業原則。」一剔擺明係嫌曼聯成績差，唔值咁貴囉！不過一剔發言人之後補充，話交易仲傾緊。一剔當紅魔係草，但三間就當佢係寶，據報三間同曼聯談判順利，好有機會成為曼聯由15年起嘅新贊助商。
雲帥柯打晨操晚練
雖然曼聯上季沉淪，但爛船都有三斤釘，相信三間都睇中紅魔球迷多；而且下季曼聯仲搵咗今屆喺世盃威風八面嘅雲高爾嚟教，有望重振雄風。雖然雲高爾人在巴西、仲帶緊荷蘭踢4強，但佢已經遙控緊曼聯嘅操練。雲帥畀咗指示助教傑斯，喺曼聯開操嘅第二日，班球員就要一日操兩課，朝早操完傍晚再操，畀啲顏色班大牌睇吓先。
【依波Live】即睇直播：
http://worldcup2014.appledaily.com/match/live
http://bit.ly/EballLive