「超人」李嘉誠或者長子李澤鉅早十年八年前，如果忽然要對社會大事或公司事務作回應，通常會叫公關call齊記者，喺長江中心地下等，扮「偶遇」，近年就好少用呢招，加埋佢舊年起取消長和系中期業績同股東會嘅記者會，要見超人一面嘅機會越來越少。
雖然𠵱家冇乜機會再「偶遇」超人，但唔代表偶遇佢唔到。噚日大約下晝5點15分，華華喺長江中心大堂落緊扶手梯嗰陣，咁啱就偶遇超人行出𨋢準備放工。雖則華華已經第一時間衝落扶手梯，諗住同超人傾幾句，但係今年86歲嘅超人真係健步如飛，追都追唔切，超人嘅背影好快就喺通往停車場條路度消失。
超人呢日着件白色短袖衫加條運動長褲，唔通放工去做運動？