香港一直係滙豐銀行喺全球業務嘅主要收入來源，但滙豐日前發表季度環球證券研究報告，卻響應中央嘅反佔中主旋律，話憂慮佔領中環會令中港關係惡化，損害香港經濟，仲將港股評級由「中性」下調至「減持」。
作為用咗滙豐30年嘅長期客仔，白鴿黨李永達非常不滿滙豐將原本嘅經濟報告，變成用嚟打擊佔中嘅政治報告，話至少五位基金同經濟學界人士都話唔認同報告內容。由於對滙豐好失望，佢考慮發揮消費者力量，逐漸少用滙豐信用卡甚至罷用，仲請教網友點樣喺網上成立群組推動呢項運動。冇咗滙豐信用卡，唔會唔方便咩？高達話仲有渣打信用卡，唔慌無卡用。