祥 Hi：肥頭，呢件就係你喺淘寶淘嘅阿根廷翻版波衫啊？
肥 頭：係啊，百零蚊咋，各位，像真度高唔高先？
艇仔張：轉個圈望吓，其實ok似嘅，啲字啊、徽章都唔覺得假，係啲布料顏色爭啲囉，但起碼好過隔籬街嗰啲，連個贊助商都印錯。
祥 Hi：仲唔畀我搵到破綻，你心口嗰兩粒星，呢隻角崩咗喎，哈哈。
大食肥牛：所以着老翻最好唔好周圍講，人哋質疑你，你咪話泰版囉！
肥 頭：係嘅，牛哥，難得你喺度，問吓你今晚有咩心水？
大食肥牛：阿根廷讓平/半，要上盤啦！
祥 Hi：咦，師父，唔明喎，荷蘭下盤唔係好啲咩？阿根廷（圖）之前咁多場波都好少開到上盤，呢場五五波，點解唔買。
大食肥牛：上場對比利時讓平/半咪開咗囉，呢場波荷蘭受讓平/半，仲要幾低水吓，我覺得好多人落飛買荷蘭。
艇仔張：牛哥，我就覺得最緊要係阿根廷實力未見底，今場又有阿古路復出，加埋荷蘭8強要互射12碼先贏哥斯達黎加，點計都划算。
肥 頭：呢場我覺得可以玩「先發事件」，推介5.5倍尹佩斯「被罰黃牌」。佢上場波都躁躁地，肯定唔妥洛賓打得好過佢，呢場一定扯火。
艇仔張：咁就要睇吓啦！
人物介紹：
德叔－－旺角茶仔老闆
肥頭－－吹水怪
祥Hi－－肥頭屋村老友
福嬸－－茶餐廳侍應
艇仔張－－扮專業賭友
大食肥牛－－賭精一名，命中率甚高
【依波Live】即睇直播：
http://worldcup2014.appledaily.com/match/live
http://bit.ly/EballLive