利豐（494）分拆大計，待利標品牌（787）明日正式掛牌後，即大功告成。市場口痕友說，如果佢係這兩間公司的大股東馮氏，應感覺左右為難。事關新股上市，你當然想佢紅盤高開「威水」吓。但如果利標掛牌後大升，即意味市場覺得呢間公司先係「正嘢」，咁係咪代表完全拆走佢嘅利豐，有好大損失？咁利豐股價係咪要跌？真係手掌係肉、手背又係肉！
不過，海迪就認為馮氏心中早有取捨，只要睇兩間公司的CEO是誰，已識分莊閒。利豐分拆後，其新CEO是馮國經之子、馮國綸之姪馮裕鈞。大家肯定要掃靚個場、夾手夾腳，創造有利環境畀太子大展鴻圖。利標掛牌後一段時間，如股價走勢得以平穩的話，應是最完滿結果。
利豐今次拆走利標，有芬佬笑說是「除三害」。第一害是債務，分拆後，會有較大比重的債務由利標承擔，利豐變相減債。第二害是風險，因利標業務，向來被市場視作風險高、波動大的生意，過去亦曾進行不少收購，影響現金流。咁第三害呢？海迪要賣個關子。如你有跟進開這間公司，你懂的。
市場耳語謂，利豐在太子當家首年，應會增加派息來吸客，但業績表現，就勸各位不要寄予厚望。相信利豐未來會buy time，希望進行一些策略調整，目標是2015及2016年交到功課。信唔信得過？8月業績就會揭曉。
海迪