梁美芬議員在立法會提出「志願軍」之說，語出驚人，不過梁振英還有點頭腦，立即向佢說不。梁美芬本身職業係城市大學法律系教師，真係想知道吓佢啲學生對梁教師嘅教學有乜睇法，佢平時是否一位好教師，如果係嘅話，又點樣好法。梁美芬又係兼職議員，由九龍西選區居民之中嘅選民直選出嚟嘅，梁美芬之西九新動力名單喺2012年九月立法會選舉得34,546票，在九龍西啱啱排名第五，得票率4.8%，力壓排第六嘅民協之譚國僑名單（30,634票），得以進入立法會。
到咗2016年，九龍西選民仲會唔會保送梁美芬重返立法會呢？睇番2012年之九龍西九張參選名單，落選嘅四張似乎冇乜知名度，陣容弱雞，除非另有泛民中人空降九龍西爭票，否則梁美芬既已成為左派悍將，又有中聯辦全力為佢護航，連任嘅機會甚高，對佢睇唔順眼，聽唔順耳之九龍西泛民選民，唯有激氣到吹鬚碌眼（按：九龍西其他直選議員：蔣麗芸，黃毓民，毛孟靜，黃碧雲。）
民主選舉嘅一個要義，係選民若然對現任民選官員（香港冇）、民選議員非常不滿嘅話，可用選票表達氣憤之意，即所謂vote the rascals out！到新一次選舉時，投票支持其他候選人，拋棄在任嘅rascal，九龍西選民或者可以諗諗，上述五名代表佢地嘅現任立法會議員之中，有冇邊位係rascal。
早前本欄寫過，有消息話執政當權者已訂策略，以硬還硬，用英文講就係tough it out，並且心意已決。既有此策略，那顧得有17.2萬人上街（鍾庭耀調查數字上限），創04年以後新高吖。因此咯喎，瞓街之立法會議員照拉，立法會內有議員擲杯，竟然報警，有違一般政府領袖尊重立法機關之傳統。梁振英嘅新動作顯然係傳出一個信息，敵我分明，即管放馬過嚟，過去特首／港督有權不用，讓人一步半步嘅習慣已拋諸腦後咯，有咁嘅企硬立場，自不然會有Tree Gun與美芬呢類人嘅嚇人言論，大家綁好安全帶呀！