世界盃轉入大直路，最後4場比賽，你又點睇呢？今晚巴西將會同德國爭一張決賽門票，如果大家有睇8強賽事，相信都會對德國門將紐亞（圖）留下深刻印象！臨完場一刻，法國嘅賓施馬喺細禁區向網頂狂抽，紐亞冷靜地舉起單手，輕描淡寫咁擋出呢個必入球，有如來神掌嘅感覺，再次喺緊急關頭拯救球隊。今晚食粥食飯都要睇佢喇！
似踢多個中堅
紐亞擁有門將嘅理想身型，高得嚟又夠硬淨，所以每次出迎高空波都有絕對優勢，十分穩陣，對住德國要喺角球、罰球取得甜頭係一啲都唔容易。加上紐亞嘅控制範圍極大，難怪德國好似長期踢多個中堅咁，連里奧費迪南都講笑叫紐亞去曼聯踢後衞！雖然紐亞唔算特別靚仔，不過計埋佢嘅領導能力同神級嘅技術，呢種真漢子絕對係有佢嘅魅力。
「高Q大棍」過時了
有啲主要用長傳同高空波打進攻嘅球隊會被形容為「高Q大棍」，意思係一腳踢上前博入波，例如係英超史篤城就以往多數採用呢個踢法。但現今足球講求組織，「高Q大棍」並唔常見。
陳婉婷
太陽飛馬助教