荷蘭喺對阿根廷嘅4強戰前受迫害？橙軍教練雲高爾計錯數？我求大俠講嘅係荷蘭竟然要喺4強開打前，被迫要搬酒店，原因竟然係啲房畀國際足協嘅官員book咗。咁究竟係國際足協迫害橙軍，定抑或係雲高爾計漏咗橙軍要住酒店住得幾耐呢？
荷蘭今屆世盃選擇咗里約熱內盧做大本營，除咗借用法林明高嘅訓練基地，日日望住個基督像練波外，仲入住市內嘅凱撒公園酒店。不過，佢哋喺4強開打前，就要同呢間住咗1個月嘅酒店講拜拜，因為啲房俾國際足協嘅官員book咗。
由於今屆決賽會喺里約熱內盧嘅馬拉簡拿球場舉行，所以國際足協有唔少官員都將會抵達里約，而佢哋亦都book咗環境優美，而且購物方便嘅凱撒公園酒店，間接逼走咗荷蘭。
啲房讓畀FIFA高層
至於荷蘭，住得好哋哋又點解會俾人逼走呢？荷足總行政總裁雲奧斯芬就覺得係一個陰謀，話國際足協特登租同一間酒店，係別有用心，仲話𠵱家無奈地要搵過間酒店。我求大俠就覺得，如果你早啲book，唔通佢可以趕你走咩，我諗荷蘭足總班人可能覺得球隊走唔到咁遠，所以一早book酒店嗰陣，淨係book到8強就算。到𠵱家入咗4強想住耐啲，已經太遲喇，人哋唔係一定留房畀你㗎嘛。
難得今屆雲高爾多次展示出佢出色嘅執教能力，有機會首奪世盃，如果因為搬酒店影響發揮，跟住斷送冠軍就唔抵啦！
3中堅陣式帶去曼聯
不過，無論荷蘭最後咩成績，我諗一班曼聯球迷都已經笑到合唔埋口，因為佢哋已經見識到來季新魔君雲高爾嘅執教功力。呢位名帥今屆帶領橙軍用防守性高嘅3-5-2陣式，令到呢隊經驗唔算多嘅荷蘭可以越踢越好，殺入4強。
雲高爾話3中堅喺曼聯都會work，下季會用荷蘭嘅戰術之餘，陣式都會改為3-4-3。曼聯最近喺轉會市場咁活躍，如果買番個一流中堅嚟拍菲爾鍾斯同基斯史摩寧兩大英格蘭國腳，防守力應該都冠絕英超。紅魔躉，出血未？
識睇 一定睇蘋果嘅足動世盃：
http://worldcup2014.appledaily.com/