雖然長毛入獄後，被迫剪去一把標誌性長髮，但唔少人覺得佢呢個短毛形象一樣好有型，工黨李卓人甚至話呀，長毛變咗短毛，即刻青春咗10年。點解呢？「抗爭令人青春。」唔知呢一點，會唔會激勵更多人參與抗爭呢？
早前第五度入獄嘅長毛噚日就喺《壹錘爆杯》節目話，今次嘅囚犯號碼係30286，係較少有嘅大冧把。佢最初唔習慣入面好熱兼冇自由，後來獲分發收音機，先聽到7.2學界佔中消息。坐監期間佢會盡量做一啲平時唔做嘅事，例如「攞住份《星島日報》由頭睇到尾」。而佢嘅獄中飲食幾健康，朝早食飯、中午食粥，下晝4點幾就食晚餐，仲有一個橙㗎。