【營商過程】
每個startup的故事，總帶點年少輕狂的特質。80後的Teddy原本「印印腳」，有間玩具貿易公司，何以冒風險搞追查包裹再創業。他反問記者，「點解個個都咁問我（再創業）？今日食完飯聽日會唔會再食呀？重新做一個startup有風險，但你乜都冇時，你都有風險啦，又要諗點開飯，嗰啲唔係風險咩？以前可能餓住肚皮做，𠵱家反而我唔使餓住去做。正如我學完日文，可以學英文，只要時機到，就去做。」
透過eBay賣VCD
Teddy自小由母親獨力養家，中三起已自己養自己。他知道做打工仔搵錢有限，遂決定自己做老闆，幫人整網頁、維修電腦，每次收費150元。由那時開始，他比其他人更早意識到互聯網世界之大，開始透過eBay賣VCD。了解遊戲規則，一直是Teddy的生存之道，「我知道畢業後我可以做一個公務員，一個好叻嘅人，不過如果只係打工，我有數計㗎，我做一世都唔夠我買樓……我唔係話買樓係一個成功指標，我只係話，我打一世工都唔可以改變現有生活，我想我媽媽住得舒適啲。」
曾被拍檔騙財
Teddy大學一年級時，與人合夥成立公司，出售水貨視象會議系統，公司首年即賺100萬元，以為賺了人生的第一桶金，豈料被拍檔「穿櫃桶」走佬，不但1蚊都冇袋，反而背負10多萬元貨數。
破產，可能是當時最方便的出路，不過他寧願諗計賠錢，「我嘅信譽唔應該係為十幾萬就冇咗，斷估我個名唔止十幾萬啦。」他為避免自己轉牛角尖，索性花盡2萬多元身家與女朋友遊日，「咁死而後已嘛，與其於一個問題纏繞，不如行開去另一個環境。」
回港後他重投eBay的懷抱，銷售中性品牌MP3機，一個月內清還所有欠款，一年內，高峯期收入達數千萬元。目前Teddy已轉營玩具的貿易公司業務早已上岸，不過，擅於發掘商機的他，從經驗發現市場未有完整的包裹追蹤平台，決定重新出發大搞AfterShip。