艇仔張：德叔，凍檸茶少甜，唔該。
德 叔：艇仔張，休息番兩日，睇你好似精神晒咁喎，仲唔使飲凍啡提神㖭。
艇仔張：係呀，前日仲趁住禮拜日返深圳揼番幾個鐘骨㖭，終於成個人精神晒。
肥 頭：咁你有冇乘機手多多先？
艇仔張：你個死仔呀，我出晒名正人君子，按腳嗰陣我睇大陸電視台，仲做埋功課㖭。大陸勝在電視台多，有啲仲專門只播體育節目，佢哋搵專家分析，都不知幾有料，仲有啲3D公仔講走位。唔似得香港，搵班人柴娃娃嘻嘻哈哈就叫做播波。
德 叔：不過人仔之前升得咁勁，搞到我哋啲港燦蝕水蝕得好深，我都幾年冇上去消費嘞。
艇仔張：講起蝕水，留喺香港賭波都蝕得勁，馬會成日叫人唔好賭外圍波馬，最簡單方法就提升番啲水份先啦。
肥 頭：係啦，好似𠵱家個勝出洲份，唔係南美就係歐洲贏，南美就1.72倍，歐洲就2倍，計一計就86折，足足抽咗14%水。
艇仔張：係呀，瓣數越少已經蝕得冇咁多，波膽、首球呢啲，蝕得仲甘呀。
德 叔：我份人賭波就好簡單，一係贏一係輸，巴西（圖）旺我，我都仲會繼續買巴西W。
艇仔張：呢場4強德巴大戰，我都較為睇好巴西，雖然冇尼馬，不過主場之利都好緊要。我就冇德叔你咁進取，落咗晉級隊伍買巴西，有1.92倍，話唔定巴西加時先贏呢。
人物介紹：
德叔－－旺角茶仔老闆
肥頭－－吹水怪
祥Hi－－肥頭屋村老友
福嬸－－茶餐廳侍應
艇仔張－－扮專業賭友
大食肥牛－－賭精一名，命中率甚高