世界盃開波冇耐，就捧紅咗「燈模」LuLu。不過如果閣下曾經諗住靠LuLu發達，相信早已大為失望。雖然LuLu已早破燈，不過生命滿希望，世界仲有Cortana！Cortana其實唔係人，而係微軟Windows Phone語音助理，即係Siri個friend。由世盃開鑼，經大數據分析，已連續貼中12場賽果，亦100%貼中四強名單。至於星期三嗰場波，Cortana預測德國會擊敗主場巴西，而荷蘭則會輸俾阿根廷！如果真係貼中，希望到時作為忠實「荷蘭粉」嘅鄰居唐牛唔好太傷心。中國人嗜賭係常識，最近唔少散戶諗住抽下新股當賭大細，點知抽中籤後反「倒抽一口涼氣」，唔潛水都偷笑。
不過有啲新股都見到雨後彩虹，長港敦信（2229）主要生產與銷售紙箱及啤牌，上市價為1.4元，首日潛水後最低見1.01元，跟住慢慢爬返上去。長港敦信嘅啤牌業務，目前只佔總收益14.1%。睇番內地啤牌公司，以姚記撲克最出名，市值75億，預測PE 43倍；而長港敦信13億元市值，以招股價計得6倍PE，如果按集團部署，未來將進一步發展高端優質啤牌，專注發展自有品牌，相信啤牌業務毛利率還會提升，估值應該睇好啲。翻查數據，輝立同凱基一早將手上嘅貨沽得七七八八，沽出嘅2,000萬股估計已俾大戶收集，街貨咁乾，不妨小注賭佢挾番上去水面。
Fifi
http://www.facebook.com/lovefrystock
本欄逢周二、四刊出