來到世盃4強，意味持續個多月的大戰去到尾聲。曾經閃耀一時的球星如占士洛迪古斯、賓施馬、阿歷斯山齊士、拜仁雷斯和侯活等，俱成為過去式，因為再過多6日，就會決出全世界的足球之王。巴西、德國、阿根廷及荷蘭4支強隊，誰能笑到最後？巴西缺少尼馬和堤亞高施華，卻有主場人海fans作後盾，對德國未必輸蝕；路維去到這階段，亦不會貿然搶攻，必定先求不失。料兩軍在法定時間內難分高下，敲和波。
前晚收工和一荷蘭躉講波經，他大嘆現代足球隊隊都以穩字行先，昔日全能足球、十上十落不復再，就連巴西也全不像樣。其實漂亮足球講就容易，既要教頭有料，球隊亦要有足夠人才；打死守擦鞋仔波呢？只要球員有紀律，夠氣夠力，貫徹戰術90分鐘就夠。防守求穩可立於不敗，縱情進攻一落後就易自亂陣腳；有前冇後，失3球入番你4球的年代早已遠去，在四年一度的世盃，各大教頭更不會捨易取難，把國家名譽作賭注。
巴西冇進攻本錢
西班牙雖然在分組賽出局，德國卻因隊中的拜仁血脈受了哥迪奧拿不少薰陶，而打出近似的風格，球隊在控球及搶截上多花工夫，以湯馬士梅拿任「無鋒陣」的尖刀，亦與狂牛用法比仔的「假9陣」大同小異，戰術細微之處有所不同，至少做到難以擊倒。德國比狂牛優勝的地方，是門神紐亞大勇，對法國那記鐵手擋球，不只震懾了賓施馬，也為力爭成全球首席門將下了最佳注腳。有他在，日耳曼城池就有了最好屏障。
巴西今仗缺少了尼馬及施華，牌面大大輸蝕，卻仍是開出平手盤，陰謀論自然認為「造都造到巴西入決賽」。不信這套，巴西是缺進攻本錢，以其中場防守的實力，配合冒勇的爆炸頭大衛雷斯，及最熟德國路的拜仁中堅丹迪，90分鐘內可保不敗。「半和」極穩但分頭平平，決直取和波，3倍略熱更見信心。
文：仙道彬
識睇 一定睇蘋果嘅足動世盃：
http://worldcup2014.appledaily.com/