特首夫人梁唐青儀上周五憑「一口涼氣」嚇到唔少人瞓唔着，其受訪片段旋即被惡搞。網民Jacky Fung將梁太嘅發言剪輯兼編曲成為一首rap歌，以《一口'梁'氣》派台，MV劈頭一句「齊昕嘅母親，無知！涼薄！齊昕嘅父親，冷血！刻毒！」，睇到唔少人好有共鳴，難怪短短一日已經有逾17萬次點擊，大家可以到 http://www.youtube.com/watch?v=4XDOqUMqCNU睇。
網民睇準梁太咬字準確，有抗衰老中心反而睇中梁太講嘢時表情多多，用梁太做「招牌」，喺facebook以「九宮格」形式，上載梁太發言嘅各式表情，配上一句：「說話時表情過多，易生表情紋，俗稱皺紋」，呢啲「所謂」嘅抗衰老中心真係大膽。