直屬中信系統中，中信泰富（267）獲阿爺悉心照顧，變相整體上市，注入靚資產，一年累升近70%。另一隻中信大錳（1091）就貼實歷史低位，有遐想。
中信大錳係全國最大錳（生產鋼材主要原料）生產商，兼祖國少有垂直綜合生產商。而中信就透過中信資源（1205）揸咗中信大錳近39%。
最近幾年，鋼鐵市場冇景，中信大錳亦一樣。但隨住阿爺重啟鐵路、公路基建、加快城鎮化，應該慢慢turn around。家陣睇中信大錳，業績暫時唔使擺得咁重。
系內最細公司
中信大錳現價0.58元，比起2010年上市價2.7元，大潛水79%，總市值得16.9億銀，係直屬中信系裏面最細市值公司。
上邊講，以中信泰富行頭，搞整體上市。呢期阿爺唔玩分拆，屬意綜合模式發展，嚟緊日子，中信大錳有冇股權重整，包括俾中信資源買斷嘅可能？
又阿爺戰略之一，係透過大型企業，四出海外併購，前排就有以五礦資源（1208）為首，巨額買秘魯銅礦。而中信資源亦啱喺5月公佈，同獨立第三方商討合作收購機會。
中信大錳係祖國錳業龍頭，一樣有機會走出去，但要搞大龍鳳，呢個市值晒士，根本搞唔到乜嘢出樣。集團市值，有機會pump up。
咪扯咁遠，中信大錳家陣PB得0.5倍。香江場內，冇近磅股，走出世界，BHP Billiton家陣PB係2.4倍，OM Holdings係1.02倍，中信大錳平咗一大截，殘到爆。當股價去到0.84元計，中信大錳PB都係得0.7倍多啲，仲未追到上邊最平嘅OM Holdings，而到時市值，都係得25億銀咁大把。
錢雋
細價股專家
本欄逢周二、三、五刊出