亞洲電視欠股東查懋聲同查懋德兄弟本金連利息2億9千幾萬，俾對方申請清盤；上周三獲盛氏家族出手還咗兩億本金後，亞視再同查氏兄弟傾掂數，9,000幾萬嘅利息一人一半承擔。清盤案噚日開庭，查氏話朝早先收到亞視交嚟嘅4,600萬蚊支票，要等埋過數先可以撤銷清盤申請，法官押後案件至下周一再處理，到時亞視先正式解除清盤危機。亞視執行董事葉家寶喺庭外話呢次係「茶杯裏的風波」，算係解決咗唔使清盤，又話王征好慷慨，將4,600萬留畀亞視做營運費，員工6月份人工已經出晒。佢更無厘頭話亞視一向關注社會民生，俾唔同意見觀眾發聲，希望市民佔領亞視唔好去佔中喎。