高盛上周五出咗份報告唱好近期升得好勁嘅港交所（388），目標價167元，噚日就輪到另一間券商Jefferies出報告力撐，目標價去到179元。港交所嚟緊仲會唔會好似兩份報告咁講會繼續有得升，就不得而知。不過，有樣嘢可以肯定嘅，就係唱好港交所嘅研究報告應該陸續有來。
濠賭股前景 大行玩晒
點解咁講？因為近年好多分析員寫報告都有條定律，第一就係有行家出咗報告，自己唔敢執輸要出番份；第二係通常會一齊唱好或者一齊唱衰，好少有勇士敢唱反調。第三就係轉軚快過變形金剛，一見唔對路就出多份報告轉睇法。
遠嘅唔講，早兩個月，濠賭股就畀券商輪流唱淡，一人一份報告講到濠賭前景一潭死水咁。最近又排住隊出報告話下半年生意會好轉，真係莊閒都畀佢哋買晒。
講到極速轉軚嘅佼佼者，就不得不提大摩喺4月底有份報告，睇好美高梅（2282）喺60日內必升，仲寫明有7至8成機會講中。但呢支「魔笛」吹咗唔夠8日就急急收埋，理由係話美高梅嘅走勢已經同當日預測時相違背。所以呢，大行報告，真係信不信由你！