正所謂修身、齊家、治國、平天下。唔少政圈中人近日熱議，貴為特首嘅狼振英隱瞞僭建，固之然做唔到修身，而佢一家最近仲引發風波，明顯連齊家都唔掂，咁佢有何德何能治港呢？加上佢治下香港民怨爆發，7.1仲有成51萬人上街，雖然呢位唔少港人眼中好「刻毒、涼薄、冷血」嘅特首，死都唔肯早啲走，但政界卻盛傳離中央換人之日不遠矣，而向來同佢唔啱key嘅曾鈺成，有望上場替補喎。
梁錦松翻閹財政司長
噚日網上媒體《852郵報》話喎，唔少大孖沙估計，當習總擺平咗周永康集團、當中南海認真審視狼英表現、以及當國務院知道要認真安撫香港民怨之時，就係中央換特首嘅時刻喎。引述有大孖沙貼屆時會由曾鈺成做特首、曾俊華做政務司司長，梁錦松做財政司司長㖭。
八方問過唔少政界中人，佢哋唔多信中央再次中途易角，唔通認自己揀錯特首咩。但亦認為，若果一旦爆冷要換人，曾鈺成係最適合人選，事關佢形象較開明，而且同泛民有偈傾，相信市民肯支持佢替補狼英餘下任期做特首。佢哋反而謔笑，曾經暗示俾狼英抹黑嘅曾鈺成，會唔會再被人用陰招阻佢入主禮賓府之路呢？
李八方
mailto:[email protected]