講開分析預測，國際經濟調查機構Consensus Economics首度舉辦「2013年最準確經濟預測獎」，恒生（011）嘅經濟師獲「最準確香港經濟預測獎」。帶領經濟研究團隊嘅執董馮孝忠披露估得準嘅心得，係佢鼓勵同事改用前瞻方法做分析，唔好以為恒生一定要保守，此外多少亦有啲運氣。
Consensus Economics係宏觀調查機構，1989年成立，每月向全球85個國家、超過700位經濟師做調查，總部位於倫敦。新辦呢個獎項係喺亞太區每個國家同地區選出一間得獎機構。恒生2012年底預測，2013年實質本地生產總值同消費物價指數分別升3%及4.3%，前者跟政府公佈嘅2.9%相當接近，後者就完全估中，因而獲獎。
恒生估今年實質本地生產總值同消費物價指數升3.3%及4.3%，睇佢能否連續兩年估中獲獎。