正義聯盟召集人李偲嫣唔再絕食後，又有新搞作！噚日佢聯同退休督察協會宣佈成立「撐警大聯盟」，8月3日舉行撐警大遊行，仲將8月4日定為撐警日。8月4日有乜咁特別？私煙BB話喎，去年呢日喺旺角行人專用區舉行撐警隊執法活動俾人踩場，所以特別有意義。
佢話初步聯絡咗10幾個團體加入，相信每個團體最少有幾百人參加，但暫時未有詳情，連遊行路線都未定。唔知係咪泛民力谷嗰首《問誰未發聲》太感人，佢哋都抄橋，話會製作撐警隊歌曲歌頌香港警察嘅偉大喎。
私煙BB宣稱早前喺政總外絕食期間，有朋友探班，教佢敲打心口三次、再展示V字手勢，決定以此手勢作為撐警隊嘅招牌動作。八方懷疑佢對狼太鬧蔡子強嘅片段念念不忘，噚日突然向記者做出將食指勾起放頭頂兩邊嘅air quotes手勢。