股評人黃國英、沈振盈先後搞talk show，入座率都算唔錯，聽聞黃德几與鄧聲興都心郁郁，有意喺明年合作舉行talk show，旨在為「傲翔慈善基金」籌款。傲翔慈善基金由有線主持劉明軒老公王傲山（傳婚變）發起，主要幫助邊青，希望以獎學金形式鼓勵曾經犯錯，或者未能適應主流教育嘅年輕人。十多名理事來自各行各業，包括音樂人雷頌德，財經界就有黃德几同埋鄧聲興。
黃德几認為，好多人都經歷過人生低潮，只要當時有人肯扶你一把，往後嘅人生可以好不一樣！佢哋一班理事現時諗緊舉辦籌款活動，佢構思緊同鄧聲興搞talk show，不過最快都要2015年。
黃德几出名鍾意唱歌，有「多倫多黎明」之稱，既然佢同雷頌德都係基金理事，唔知雷頌德會否作首歌畀佢到時表演呢？黃德几就話都唔係冇可能㗎！咁真係睇下雷頌德同呢位「黎明」能否擦出火花嘞。