性女Vienna、仙樂都、亞姐王家敏同幾個亞視藝員，前晚為咗幫亞視新節目《子夜特區》做宣傳，去咗中環蘭桂坊派安全套。Vienna超熱褲兼露腰，仙樂都性感谷胸露事業線，搞到成班外籍男好似蜜蜂咁黐埋去要影合照，熱情到攬頭攬頸，而三女一啲都唔抗拒喎！Vienna更加不停擺出誘人甫士。
冇見一排嘅Vienna話有秘密嘢搞緊，問佢所謂秘密嘢係咪要結婚？點知佢自爆：「我結過啦！我同先生結婚5年，已經離咗婚，我入成人台第一日就已經離咗，因為佢接受唔到我做成人節目。」
仙樂都派套感尷尬
雖然都着得好性感，不過就唔夠性女咁識搶鏡嘅仙樂都，就話派安全套有啲尷尬：「不過如果安全套可以令女方唔使做未婚媽媽，都係好事。」至於着到好密實，驚死俾人睇蝕嘅王家敏，就話有啲驚：「嗰班外籍男士攬住我條腰，其中一個仲好似想錫我咁。我平時好少去夜場，今次有啲唔慣。」不過佢預告會幫亞視主持兩性節目，會同嘉賓分享感受，會講自己嘅性經驗。
撰文：馮仁昭
