尼馬當晚因傷被抬離場，及後更證實緣盡世界盃，數以萬計女球迷就話唔使再睇世界盃。冇人能敵傷病，尼馬受傷固然難受，但我覺得都唔及冇得再睇哥倫比亞同占士洛迪古斯咁失落同可惜。
靈敏、勇悍、罰球準
既然巴西殺入準決賽，而尼馬又未能上陣，前線嘅費特同侯克技術同外表都冇乜值得欣賞，不如大家將啲注意力擺喺鐵衞大衛雷斯（圖）身上，4強仲要缺少中堅拍檔堤亞高施華，相信大衛雷斯會撐起成隊巴西。唔好唔記得，上場波嘅罰球入波唔係來自尼馬，而係大衛雷斯！呢位鐵衞身形唔算太魁梧，靈巧度及速度都比一般高大中堅好，勇悍嘅攔截令對手難以招架，勁在唔止角球爭頂厲害，連罰球都又飄又準！爆炸頭造型深入民心，加埋一對大眼睛，其實都幾型！
擺烏龍冇陰功
好多後衞都試過「擺烏龍」，其實即係Own goal嘅意思，將皮球送入自己網窩，真係好無奈㗎，嚟緊大衛雷斯又會唔會計隊友馬些路喺揭幕戰之後，擺多球老烏呢？
陳婉婷
太陽飛馬助教
識睇 一定睇蘋果嘅足動世盃：
http://worldcup2014.appledaily.com/