比賽呢家嘢，好多時英雄同狗熊真係只有一線之差。環法單車賽上周六喺英國列斯展開，有主場之利嘅卡雲迪殊（前）求勝心切，喺一堆車手齊齊作最後衝刺嘅時候試圖突圍，結果喺終點線前200米炒車，仲累到其他車手都仆低埋，阻人發達。雖然佢最尾都頂硬上衝線完成比賽，但係賽後證實鎖骨甩骹，緣盡今屆比賽，認真無謂。據聞可能要做手術，連月底嘅英聯邦運動會都參加唔到。
不過，呢位29歲嘅OBE都肯認錯，承擔責任，仲話之後會向無辜受害嘅對手道歉。至於今站比賽就由德國嘅基特爾以4小時44分07秒率先衝過終點，擸咗件黃色戰衣；喺頒獎台度，劍橋公爵威廉王子同太太凱蒂仲幫基特爾手，着靚件黃色戰衣，一啲皇室架子都冇！而參加環法嘅中國史上第1人計成，雖然爭冠軍冇佢份，但佢起碼都喺5個鐘內過到終點，排第191位。
識睇 一定睇蘋果嘅足動世盃：
http://worldcup2014.appledaily.com/