阿根廷打破近年世盃最佳紀錄，成功擊敗比利時打入4強。球賽過程唔算話特別精采，唔知阿根廷教練沙比拿係唔係因為覺得班球員唔生性，娛樂唔到球迷，所以就捨身成仁，親自出馬嚟回報一班捱眼瞓睇波嘅球迷呢！
之前4場都冇乜表現嘅希古恩，今場射入奠勝1球，仲成為呢場比賽嘅最佳球員。其實佢除咗入嗰球，仲有一次以1敵6，通完高柏尼坑渠之後起腳勁抽射門，連比利時嘅守門員泰拔高圖爾斯都投晒降，但係就過唔到條門楣，無法增添比數。
見希古恩中楣差啲仆低
教練沙比拿見到呢一幕，失望到成個人軟晒向後挨，但係自己又唔係MJ，冇咁好舞功，最後就失平衡，差啲仆低，好彩後備席有職員扶一扶佢，如果唔係佢老人家咁樣跌一跌，容乜易好似尼馬咁，要緣盡世盃㗎？
好彩最後呢一跌冇令到59歲嘅沙比拿受傷，仲令我哋一眾球迷有茶餘飯後嘅話題。喺外國已經有唔少球迷爭先幫沙比拿改圖，包括將沙比拿key入《街頭霸王》嘅遊戲畫面，俾阿龍打到飛起；仲有笨豬跳、喺《廿二世紀殺人網絡》入面避子彈、骨牌等等，當然唔少得同MJ共舞啦！真係創意無限。
不過講開又講，雖然沙比拿係有人扶，不過佢自己本身平衡力都唔錯，如果唔係已經一早仆低咗啦，根本冇俾人扶嘅機會。其實都唔出奇嘅，沙比拿喺球員時代都係一個出色嘅中場，70年代已經去英格蘭搵食㗎喇，身手梗係有番咁上下。世盃去到最後直路，一定越嚟越激烈㗎喇，下場同荷蘭爭入決賽，睇吓班球員可唔可以生生性性，早早入多幾球，放場波入雪櫃啦，如果唔係沙比拿又睇到咁緊張，唔知下次又做出啲咩高難度動作㗎喇。
識睇 一定睇蘋果嘅足動世盃：
http://worldcup2014.appledaily.com/