早前用自己一雙腳走勻全港18區「毅行爭普選」嘅白鴿黨葵青區議員尹兆堅，似乎覺得自己行都唔夠，要有埋架戰車周圍走先至夠威力，所以佢最近整咗架印有佢嘜頭嘅「權益號」戰車，巡遊18區向各區市民提供房屋、勞工、社福同業主權益等諮詢服務，當然唔少得有各式資訊小冊子派發，佢亦好歡迎市民向佢哋就政制發展提供任何意見，以便向政府轉達。尹兆堅話，戰車特登擇日喺7.1落地，好有紀念價值。查實尹兆堅日前先向警方「自首」，話自己有參與7.1遊行；喺警方濫捕濫起訴之下，八方提提尹兆堅，第日架車唔好開咁慢，仲有，停車，記住熄匙呀。