上星期511人喺遮打道預演佔中後被捕，有個在場旁觀者俾人摑咗巴，但俾現場人士指係建制派卧底，煽動群眾，立場飄忽。「飄忽示威者」阿Tim事後同八方大吐苦水，佢話自己的確扮過警隊演習嘅示威者，更幫建制派反拉布集會嗌過咪，但全部都係因為佢曾經係特約演員。阿Tim解釋，特約演員事前根本唔知做乜角色，到場之後想推job就同博炒冇分別，$550報酬佢已經即時塞晒入人力籌款箱，𠵱家亦已轉工去電視台做PA。至於俾人話係內鬼，佢就話自己無辜，「現場有消息話戴面罩嘅人係警方卧底，當日我戴圍巾諗住擋胡椒噴霧，可能因為咁引起誤會」。