左丁山兒童時代，曾在荔枝角道近雷生春一間地舖寄居，朝拆晚行，日間地舖要做生意，小童無活動餘地，於是走出街外遊蕩終日，聽講荔枝角最遠處有「兒童樂園」荔園，但無錢入內，最多係行行重行行，行到荔園外嘅荔枝角海灘玩沙玩水，後來年紀稍大，就到東方泳棚學游泳。
昔年離海灘不遠之山上，有一間醫院，聽講係醫麻瘋病嘅，幾乎生人勿近，始終唔敢摸上去。估唔到幾十年後，經新亞校友陳萬雄博士及朋友黃景強博士邀請，卒之走上去一看「真面目」，當然已經唔係麻瘋病院啦，而係經過活化保育、變形轉型而設立嘅「饒宗頤文化館」，正確地址係青山道800號，坐地鐵到美孚站，喺B出口出到嚟，朝香港大學SPACE方向，行到中電變電站，上行人天橋，左轉往青山道休憩公園，於交通燈處橫過青山道就到達。坐巴士有31B、32、35A、36B、40、270B、280X至文化館站落車。此地原來早於1887年已係清政府九龍關，1904年興建華工宿舍（豬仔館），1920年建成荔枝角監獄，1938年改建為傳染病醫院，1975年改為精神病醫院，2000年成立荔康居，2008年納入「活化歷史建築伙伴計劃」，中華文化促進會入標成功，經一輪考核裝修，2012年就成立饒宗頤文化館第一期。
現在全館裝修完畢落成，分下區、中區、上區，下區係展覽館及保育館，展出饒先生墨寶、國畫，中區有演藝廳（可舉行百人會議、戲劇）、修學精舍，上區係翠雅山房（賓館），租金不貴，文化藝術界有優惠，房間裝修簡單雅致，享有「無敵美孚景」，幾十年前當然係望出去一片海洋啦。陳萬雄校友就係饒宗頤文化館館長，佢同左丁山講文化館會舉辦不少文化藝術活動，歡迎學校組團參與，一啲地區性／國際性文化藝術活動亦會在此舉行，文化館勝在有賓館客房招待訪問學人／藝術家也。展覽館內有饒公之「香江情懷」書畫，如屯門海崖，梅窩寫生等，但最令左丁山佇望良久者，就係一幅「荔枝角海灘」！此館位於山上，有樹蔭環抱，不聞美孚及青山道行人及汽車之繁雜噪音，誠鬧市綠洲也，可作竟日遊。