社運鐵漢長毛梁國雄，雖然由長毛變短毛，戰鬥力絲毫未減，變身Running Man。由小監獄走番入「大監獄」，毛哥前日朝早9點20分出冊，36個鐘未夠已跑咗六場，由警察總部示威到中聯辦，仲連電台都去埋，連慶祝出冊都唔得閒。到噚晚7點，戰友先有機會搞大食會幫佢洗塵。
「長毛」過程需時3年
回一回帶，長毛前日一出冊，即刻馬不停蹄四圍走。佢先喺荔枝角收押所門口火燒白皮書，再帶社民連班兄弟去警察總部，聲援搞7.1被捕嘅民陣五子，兼燒埋警隊一哥曾偉雄嘅頭像。忙完大半日，長毛夜晚仲有精力去港台講波，睇埋阿根廷晉級四強先有得唞。
玩足一日，隔幾個鐘長毛又再出動去《城市論壇》。唔知傅振中同班維園阿伯係咪太耐冇見長毛，論壇開始前又出拳又掟蕉招呼長毛，最後搞到主持謝志峰要搵警察入場。長毛即場食咗隻蕉，仲笑傅振中收成20萬銀，都係搵得20個人「示威」，真係要叫中央調查吓。論壇完咗長毛又走咗去中聯辦示威，要求中共釋放維權人士唐荊陵。
卒之等到噚晚7點，出冊第34個鐘，終於返到社民連總部，黨友搞咗個大食會為7.1遊行慶功兼賀佢放監。長毛第一件事就叫大家唔使擔心佢把頭髮，因為佢個名正確係讀「長大」個「長」，預計「長毛」過程需時3年左右啦，不過佢就講明會佔中，都等唔到咁耐，仲以法國大革命烈士丹東（Danton）名句「勇敢，勇敢，更勇敢」贈大家。長毛噚晚仲話點都要鬧埋梁振英老婆梁唐青儀，話佢似足江青，恃住自己係特首夫人就四圍撒賴，正宗潑婦罵街。
李八方
mailto:[email protected]