世界盃已經踢到最後直路，我就好期待巴西喺4強鬥德國嘞，事關巴西嘅攻擊重心尼馬受傷，起碼要唞番成個月，22歲嘅佢，就咁同今屆世盃say goodbye。作為球員，最痛真係莫過於此，臨到重要關頭先至無端端傷咗，原本好有期望帶住隊波喺主場捧盃㗎嘛，呢種絕望嘅心情，仲慘過中咗幾千萬六合彩至知張飛原來唔見咗呀！
對巴西嚟講，尼馬缺陣確實係好大嘅打擊，但我就覺得呢個或者係個機會，畀佢嘅隊友自己take risk，藉住尼馬嘅缺陣，做番啲成績畀人睇；等嗰啲一路都睇死佢哋剩係靠尼馬搵食嘅人，對佢哋另眼相看啦！
至於我都喺上個星期六嘅「Winner Stays」出咗線，雖然開始時未掌握到踢法，特別係個場好細，對手又逼得好快，仲要唔可以喺禁區內掂波，否則就罰球。我哋一開始就犯咗呢個錯，仲俾人哋入埋波，好彩之後反勝，跟住仲越踢越順，最後以不敗身攞埋分站首名，不過連續踢成7、8場都咪話唔攰呀！但諗到決賽可以對住個維港踢，你話點可以唔搏盡佢呢！
文：許家樂
識睇 一定睇蘋果嘅足動世盃：
http://worldcup2014.appledaily.com/